[عبدالله خلف العتابي]

يوم الما اكتب لبو السجّاد
احس ذاك اليوم ضاع منّ عمري

واحس حتّى القلم ويّاي زعلان
وما يرضه يتعلّك ابجيب صدري

يكلّي مثلك وعندي احساس
ليش اتريد اتبس بيه حبري

كتلّه الذنب مو منّي ثقّ زين
انه المرض عذّبني والباري يدري

احس اذا ما اكتب لبو السجّاد
احس ايدي مشلوله والدمع يجري

مو اني الجنت اوصيك واكلّك
اكتب اسم حسين ابوسط كبري

واليوم هم صرت اني الاوصّيك
روح لكبر حسين ولحالي ادعي

والله حسين ميخيّب اظنونك
يردّك فرحان وترجعلي صحتي

وشوفك شوفت المشتاك واضمّك
لصدري وحلفك بالصار ياعمري

اسف يا رسول الله وهم اعتذر
ولان ما جبت طاريك وانته فخري

ارجوك سامحني واقبّل هالعذر
لان مصاب حسين ابكلبي يسري

صح اذا ما اذكر فخر الكائنات
احس ارجعت كافر وحقّ ربّي

ولساني اذا ما جاب طاري الولي
احاجي الروح منهو بعد يشفعلي

واذا نسيت البقيع وكبوره ثقّ
احس كبري مهدوم وممسوح اسمي

واتعمدت ما جيب طاري المدينه
معزولين وهاي المعالم تزهي

واذا ما ازور موسى ويمّه ادعي
وانادم الروح للحاجات يكضي

ومن كثر صبرك سيّدي سمّوك
ونعشّك وي الشمس هاليوم يضوي

واذا ما اكتب للرضا غريب الطوس
احس عايش ابوحشه وانه يم اهلي

واذا يوم ما احجي عن علم الجواد
احس الدهر عشّته اوزاد سنّي

رغم قلّة اسنين عمره الجواد
وبس علم الجواد لليوم يزهي

ويوم الما اذكر علي الهادي
نازل ابداري واحس اليوم منفي

خافوا من كثر طوفان علمك علي
وخافت العدوان والهادي يدري

واذا يوم ما اذكر نور العسكري
هم احس ابروحي وي السباع اجري

اسف وهم حيل اعتذر للزهره
والله ما ناسيج يا فخر النبّي

عمر اليمر وما انخاج يازهره
عمر ما يسوه واحس مكسور ضلعي

اواسف وحيل اعتذر ياعبّاس
وما ناسيك والله يافخر الولي

واريد اختم ويم المهدي اكول
عجّل ظهورك والله نفذ صبري

وبعدكم صارت الانذال تحكم
وبشيعتك ياسيّدي زين تدري

ماترضه اتعيش امّهانه وذل
اوتنتظر سيفك يبن العسكري

وهم نبقه ننطر ليوم الظهور
نصبر والصبر محمود ياربّي

++بقلمي++
خادم اهل البيت(ع)
عبدالله العتابي

[عبدالله خلف العتابي]

هناك وقع خطا اثناء الطباعه والتمس العذر
كتله الذنب مو مني ثق زين
الصح
وكتله الذنب مو مني والله
وكذلك
واذا نسينت البقيع وكبوه ثق
الصح
واذا نسيت البقيع وكبوره صدك
وكذلك
هم احس ابروحي وي السباع اجري
الصح
هم احس ابروحي وي السباع تجري

ونلتمس العذر منكم وشكرا