[خالد محمد مهدي]

((من تنخه تحضرهه)) لسان حال أم البنين مع العباس عليهما السلام))

*************

عباس \\ لوشفت زينب بخطر

عباس \\ من الغيمه نزّل المطر

برايتك تسترهه **من تنخه تحضرهه

***************

يمُه آنــــــــي العمر كلّه روحي منذوره الرضاهه

ومن أحس ضايك خلكَهه بس أريد اعرف شجاهه

ولون دمعه أتسيل منهه صعبه من أسمع بجاهـــه

رموش عيني غطه ألهه وأمَّك أمقصره برباهــــه

يبني \\ عندك وصيّه من علي

يبني \\ الزينب تكَلهه أدللــــي

لوصيته تذكرهه**من تنخه تحضرهه

***************

جيت عالباب وخذتهه خذت كَلبــــي من مكانه

طلعت أمأمنه بجفَّك الوعــــد هذا زمانــــــــــه

ماتفاركهه أبد لحظه يبني صير ألهه أنته آنـــه

بكربله وعدك تحضره وشوكَي ينتظرك هنانه

ردَّت \\ وعرفت منهه كل خبر

ردَّت \\ عافتك جثَّه أعله النهر

الدمعه تفجّرهه **من تنخه تحضرهه

***************











للمعالي رفعت راســي من سبحت بفيض دمَّك

لايمينـك لايسـارك فدوه أروحــن الـك وســمك

كَبال وجه الزهره وجهي مافِشل ورضيت أمَّك

صحت يحسين بوكعتك وياه أحضرك لوَن يمَّك

عينك \\ طفّاهه سهم المشرعه

عينك \\ ياسِر بيهه الله أودعه

الاطفال تنظرهه**من تنخه تحضرهه

***************

هذا زود ألّبي أعرفك نخوه والغيره وحميَه

أتجسدت كلها مواقف شامخه بالغاضريــــه

شرف تستاهله يبني من فخــــــرهاي المنيَّه

أبين أحضان المودَّه يحضنك أبن الزجيَّــــه

ظهره \\ أنحنــــه والحيـــل أنهدم

ظهره \\ من طحت ياراعي العلم

والنار وجّرهه**من تنخه تحضرهه

***************

أربع رسوم أرسمتهه ورسم خامس أخذ روحي

جروحي ماتلجمي يمّه بأسم ابو اليمه جروحـي

كَبور أشبكَهن ونوحن وعلــه كَبــره زاد نوحي

أتفور لعيون بدمعهه فوحــي يامعاتــي فوحـــي

دهري \\ حيلي أخذ ظهري كسر

دهري \\ من عنــده عانيت الأمَر

والروحي فسّرهه**من تنخه تحضرهه

***************

بسم الله الرحمن الرحيم
طوَّعت الحروف بحب أبو اليمَّه
وخط بالروح فوك الورق كلماتي
عسا يقبلنــــي ذرَّه بدرب زوّاره
ويرضه بدمعتي وونيني وآهاتي