[خالد محمد مهدي]

(( تاريخ العراق ))
**************
تاريخ العراق أيشرِّف التاريخ
خط أله النجم والشجر كلماته
والامجاد يم أمجاده تتلآكه
وكلهه تنحني مجبوره لآيايته
بجنوبه وشماله بشرقه وبغربه
وينخله وفراته ودجلته وذاته
حدوده نار تلهب تشوي طير الطار
من يدكّدر يعبره يمنه عبراته
زلم نخوه حزمنه غيرة العباس
يعرفون الشريعه وخبر وكّفاته
مايرضون بالعيله التدك الباب
ونهلي بالكّصدنه ونرد عازاته
حقَّك ياعراقي تشمخ براسك
من مثلك تلوح القمم راياته
وطنه الابو وجفوفه نهر وتراب
وعيونه الشمس والشجر شيباته
جبير العمر لاكنَّه شباب الروح
ويظم صبره جروحه وكل معاناته
بقه كّلبه جلد ويشابك الاحلآم
يعرف باجر أيحققله غاياته
أله البلدان غصبا تركع وتسجد
ومتأهبه النجوم أطيع أشاراته
بلد آمن ورب الرحمه آمنَّه
من يكّدر عليه ويبوك بسماته
صاحب طيب ابونه وبخت ويشوّر
ويله النزَّل أعله خدوده دمعاته
وكّت الغيض من يغتاض شوفونه
يرد عشرينه وألنه تعود فالاته