قصيده الى ابي الفضل العباس عليه السلام
اهدي ثوابها الى اموات القراء الكرام واموات شيعة امير المؤمنين المنسيين .. راجياً القبول من الله تعالى
( *واللهِ ان قطعتموا يميني .. يميني* )
( اني احامي ابداً عن ديني .. عن ديني )
هذا آنه شبل الكرار
ويـلــوكَـ اليه البتار
....1....
هذا آنه موت الحاقده ابصمصامي
هذا آنه وشحده الوصل لخيامي
هذا آنه تشهد بالفخر ايامي
هذا آنه اروي ابماي عيني الضامي
هذا آنه وبطف كربله .. ميداني .. ميداني
محد جِــسَر يوصل كتر .. صيواني .. صيواني
عندي مهند من نار
ويلوكَـ اليه البــــتار
....2....
شحده اليكَــّرب للخيم وبيمناي
بـَتــّاري يهتز والحرايب سلواي
ذاخرني حيدر يالتسمعوني الهاي
وبعهدي اوفي وزينب ابنص عيناي
يازينب انه ابخدمتــج .. يا زينب .. يازينب
وابكَــه آنه احرس خيمتج .. ما اتعب .. ما اتعب
انه ابن حامي الجار
ويلوكَـ اليه البتار
....3....
يا بت علي ابزود الحرب تدريني
و آنه الاشدن مـحملج بيمـيني
لو ردتي حاجه لو طلب ناديني
رهن الاشاره ابكل وكت تلكَيني
بت والدي بروحي انه .. افديهه .. افديهه
وسكنه العزيزه بناضري .. احميهه .. احميهه
عباس انه المغوار
ويلوكَـ اليه البتار
....4....
طف كربله حومه حرب وآنه الهه
وبسيفي لـكَــــــلب عاليهه سافلهه
من حيدر اورثت الشمايل كلهه
آخرهه يتبع بالـــمَجـِــد أولــهه
ليث الوغه وصِل الحرب .. والرايه .. والرايه
بيمنايه واليـسره العـمــد .. والثايه .. والثايه
معروف اْنه بخط النار
ويلوكَـ اليه البتار
....5....
حيدر ذخرني الكربله او وصاني
لحسين ابو اليمه سند خــــلاني
ساقي عـطاشة كـربله سماني
واليوم اجه يوم الوعد شمتاني ؟
راح اطبكَـ الكَاع ابسمه .. شوفوني .. شوفوني
واغسل وصخهم بالدمه .. خلوني .. خلوني
كَــوم آل اميه الاشرار
ويــلوكَـ اليه البتار
....6....
يا محله سهم البلبصر صوبني
ويا محله رمح البلكَلب تعبني
وعامود غدره بهامتي جنت اتني
بس سهم جود الماي هدني وذبني
واعدت اطفال الغدت .. عطشانه .. عطشانه
يا عمي تنده والعطش .. آذانه .. آذانه
يعذرني طــهَ المختار
ويلوكَـ اليه البتار
تمت بفضل الله 30/09/2009
زكي الياسري
( * تضمين لابيات ابي الفضل عليه السلام* )
الى العباس ابن علي بطل كربلاء المغوار اقول
العرض العادي
