غصن النور
يا اول غصن فرّع ابحضن النور
واستكمل صفاته ابكوثر العفه
ويا اول نجم شايل سنى الشمسين
وامصلصل نسب ومن الشر امصفه
نوره من النبي او مصقول بالكرار
وابعقد الامامة الخالق امشرفه
اهو جنح السماحة الفيه ماله احدود
جفن الما ينام ابفيه ظل يغفه
واهو نبع العطاء الما كطع جاريه
بيه الجود سامي او اسمه الـ امعرفه
ايخسه فكر الظلم ولسان صوت ابليس
اذا خيره اليفيض اتمكن ايوگفه
تعب جف الدهرگد ما كتبله اشعار
لان عمر الدهر طال ابفضل جفه
وعجز مد السنين ابحره لمن فاج
دام اهوايه فوجه وما عبر جرفه
علو جتف الثريه اشكر فوگ الگاع
لاجن هالعلو ما حد طرف طرفه
لان علّه ابشموخه ابعالم التقديس
وابهالة معاجز دايره اتحفه
وجه شمس الحقيقة الكشف ليل الزيف
بلا وجه اليشع محد تره ايكشفه
حمل صيت الشريعة ورف لواء الدين
او يرج الكون كلما يمنته اترفه
حفظ نهج السماء وامّنه الـ هاليوم
من جمع الخديعة الرايد ايحرفه
تثبت بالصلح بس عين ما شافوه
عميه ابلا بصيره وعجزت اتعرفه
صبح سيرة مجد و ابگصة الايام
دامت والامر محسوب مو صدفه
حتى اشما تمر اجيال بيها اتعيش
واتفل القيود البيها متجتفه
مثل شخصه العقول اتيّه ابمعناه
واقلام الخيال اتسلهم ابحرفه
بيه سر الجلالة استودعه المعبود
وابطاري الكرم من ساعته اموصفه
لذا ... ركب الشعر اعلن الاستسلام
صرح مثل الحسن هيهات يتوفه
غصن النور .. لولادة الامام المجتبى عليه السلام
العرض العادي
