[مسلم جميل جبر]

شعر شعبي عراقي : ملينه الجذب .....

مل مني القلم ومن القلم مليت
عمت عينه قلمنه الما نفع شِعره

تعب حته الشِعر ويه العراقيين
وصار بحال اهلنه وبالعراق ادره

رسمت حروف العراق برسم فنان
وجمعت اربيل والانبار والبصره

وگلت لازم حروفي توحد الخوّان
ما معقوله هيچ تصير فد مره

ورديت ولگيت دموع عالوجنات
حروف الي رسمتهه اليوم متطشره

كردستان تحچي بزودهه وتگول
احنه العاصمه وبغــداد متأخره

والانبار شالت سيف عالخوان
لو ليه الحكم لوفلّش الاسره

والبصره تگول احنه نريد اقليم
ومن نفط العراق الكُم فقط عُشره

وشفت للفتنه والله العراقيين
دون حروف جر يا ناس منجرّه

مذبوحه المحبه وناس تكره ناس
سويه الي يحب والقابض الجمره

حته الورد ما يرضه بعد بالماي
من دمنه تريد الورده والشجره

رقم جبنه قياسي بالقتل والموت
وصرنه اول شعب نص اهله متهجره

نهر دجله يـا ناس من الجثث غرگان
خلي نمد ادينه لدجـــــــــله وانجرّه

على جثثنه ادور هالفضـــــــــــائيات
ياهو الي يصــــور ياخذ الاجــــــره

معصوبه العـــــيون مچتفه الايدين
وانواع الرصاص يچوب بـــــصدره

لا اهله اجوي وچــــــــفّنوا بچـــفان
مجــــهوله الـــهويه ومن درة بأمره

اذا امّه الــــحنونه الصايمه برمضان
ما اكــــلت اكلهه وبقت تـــــــنتضره

تنــــــتضره يرد وتريد تحــجي وياه
اثاري العيـــــــــد لازم ينگطع مهره

لان باعت ذهبهه بشارع الصياغ
حته تزوج ابنهه الما فرح عمره

ما نامت بقت سهرانه كل اليل
ايا ليل العراق الما بزغ فجره

وما جاهه صبر طلعت تدور عليه
مثل طلعة حمامه بعينهه العبره

وما شافت ابنهه وجاهه ملك الموت
تعرف شنهي يعني تموت بالحسره ؟؟

معناها الفرح صاير مثل رجال
شايل ورده بيده وخنجر بضهره

معناها عراقك كاتل ومكتول
سوده گلوبهم وعقول مفتره

وكل هذا ويگلي احنه العراقيين
سنه وشيعه عشنه الحلوه والمره !!

لا والله چذب احنه العراقيين
سنه وشيعه مثل الضره عالضره

ملينه الچذب وليمته وليا دوب
واقع حال لازم نخضع لامره

ملينه الچذب وليمته وليا دوب
قصايدنه اجت للناس متأخره

نعم خوان احنـــــــــــــــــــــه
نعم خوّان احنه وياك آني بهاي
بس مو من بعد تفجير سامرّه

بعد تفجير سامرّه العراقيين
مثل فلم الرعب ودمايته الحمره

مو فتنه صحيح الصايره ابّغداد
سونامي الفتن بغداد منتشره

قتل مو عالهويه هواي متوهمين
صارت عالاسم گص راسه ويشمره

واليگلي تبالغ انته حيل بهاي
جبت حجه ودليل وياي هالمرّه

اتحده بكر واتحده ابو الخطاب
افن واحد البيهُم يوصل الثوره

واتحده على واتحده هم حسين
اذا فلوجه طبهه ومنكسر ضهره

صـــــــــفر كل النتايج للعراقيين
بس بالفتنه جابوا عشره من عشره

هذا يگول سني ناصبي اغتالوه
وهذا يگول شيعي رافضي نكفره

ظلّوا بهالسوالف يا خزي ويا عار
واسرائيل علگت نارهه الــــــكبره

يول وين الــــــــشرف گدامكم بغداد
شــــــگّوا ثوبهه واخذوهه متأسره

غتصبوهه الكُفر ... ما تسمعوهه تصيح
آنه ام الــــــــــــشرف واليوم مو عذره

بعد والله ما يــــــــــــــنفعنه قيل وقال
لات كـــلشي انتهه وانكــــسرت الجرّه


مرحوم الـــــــعراق استشهد من سنين
يا وسفه صفـــت أشلائه مـــــتنثره

متنـــثره بمزابل يمـــهه كوم چلاب
اكلت من لــــــحومه وما درت سرّه

صــــير وياي بس هالمره اترجاك
عيب من الــــــــــــعراق اليوم نتبرّه

صعبه بمزبله جثة الــــــــعراقي تصير
خلي نشــــــــــيله منهه وندفنه بگبره ...

[أمل]

حته الورد ما يرضه بعد بالماي
من دمنه تريد الورده والشجره

رقم جبنه قياسي بالقتل والموت
وصرنه اول شعب نص اهله متهجره



مرحوم الـــــــعراق استشهد من سنين
يا وسفه صفـــت أشلائه مـــــتنثره


آآآآآآآآآآآآآآآآخ توجع القلب ...

حلوة كثيييييييير بس توجع القلب .....

الله يفرج هم العراق

اخوي انت كاتبها هاي ؟؟؟؟؟

نتأمل يكون العراق موحد .....اكيه تركيا ناوية عليه بعد ..حتى تكمل

إنا لله وإنا إليه راجعون

آآآآآآآآآآآآآآآآآآآآآآآآآآآآآآآآآآخ

تحياتي

[حيدر الوائلي]

مرحوم الـــــــعراق استشهد من سنين
يا وسفه صفـــت أشلائه مـــــتنثره

متنـــثره بمزابل يمـــهه كوم چلاب
اكلت من لــــــحومه وما درت سرّه

صــــير وياي بس هالمره اترجاك
عيب من الــــــــــــعراق اليوم نتبرّه

صعبه بمزبله جثة الــــــــعراقي تصير
خلي نشــــــــــيله منهه وندفنه بگبره ...


طيب اللة لسانك اخي الشاعر جمــــــــــــــــــــــــــيل وانشاء اللة الافضل لنا ولبلدنا اللة اكبر وليخسأ الخاسئون

[قوت القلوب]

والبصره تگول احنه نريد اقليم
ومن نفط العراق الكُم فقط عُشره

وشفت للفتنه والله العراقيين
دون حروف جر يا ناس منجرّه

مذبوحه المحبه وناس تكره ناس
سويه الي يحب والقابض الجمره

حته الورد ما يرضه بعد بالماي
مشكووووور أخوي مسلم جميل
على قصيدتك المميزة وننتظر جديدك
ونظرا لأن القصيدة طويلة لو انك جزئتها
ألى جزئين وذلك أفضل
أختك قوووت القلووووب